Jedina žrtva erupcije je pedesetšestogodišnja žena koja je doživjela infarkt
Na sjeveru Indonezije aktivirao se vulkan Mount Lokon koji je danas počeo da izbacuje lavu i oblake toplog pepela, zbog čega je iz pokrajine
Sulavesi evakuisano oko 6.000 stanovnika, a jedna žena je umrla. Neka stabla su zapaljena od lave koja se slivala, a vazduh je bio težak zbog čađi i mirisa sumpora, naveli su evakuisani stanovnici, prenijela je agencija AP.
Jedina žrtva erupcije je pedesetšestogodišnja žena koja je doživjela infarkt, dok su vojnici i policija pomogli spasiocima da evakuišu više hiljada stanovnika iz ugrožene zone, rekao je Džimi Eman, gradonačelnik obližnjeg grada Tomohon. Evakuisani su smješteni u škole, džamije i skloništa, prenijela je agencija AP.
Mount Lokon koji se nalazi u sjevernoj pokrajini Sulavesi aktivirao se jutros, pa su aviokompanije upozorene da avioni, u rasponu od 10 kilometara od kratera, lete van te zone i avioletovi nisu otkazani.
Više od 33.000 ljudi živi na plodnim obroncima te planine i mnogi su otišli iz domova prije trostruke erupcije Maunt Lokona.
Maunt Lokon je jedan od 129 aktivnih indonežanskih vulkana. U indonežanskom arhipelagu živi oko 240 miliona ljudi koji se suočavaju sa čestim zemljotresima i erupcijama vulkana.